1) 申請篇

實現左我二十二年最大既願望，我覺得自己有義務記低日本working holiday準備前後同埋實行中既經過！

係知道有日本工作假期依回事後，已經立即決定左要申請。多謝我屋企人支持，等我可以忘記養家既責任再去任性一次。由於第一期申請既時候仲返緊學，所以就留待第二期五月頭先申請。

好記得四月尾正是趕paper既時候，而我既腦袋一邊度緊TRA3070份term paper，一邊思考我application份計劃書應該點寫。自問對日本既熱愛唔會比任何人少，亦都好清楚自己係作文高手，但係對住依份對成功與否有最關鍵作用既計劃書真係遲遲唔敢下筆。係依個時候，係網上面識到一位第一期成功取得visa既朋友，係佢既幫助同建議下，我終於開始動工！

參考左依位朋友既意見，我一開始就寫低點解我會想去日本一年，同埋去到我會想做d咩。想去日本最大原因：1) 太中意網王，依套漫畫對我生命影響好大，無佢我一定唔會咁中意日本 2)X Japan，比佢地完成夢想既決心深深地感動，每次想放棄都會諗起yoshiki,hide,toshi佢地果團火，依團火亦都一直支持住我。而去到日本就係想追尋X Japan既足跡，去神奈川呼吸網王既氣息……同埋食烤肉=.=當初都有擔心漫畫同偶像會搞到好似細路仔去玩咁，但係諗深一層，漫畫同音樂唔係正正係好能夠代表日本既野咩？漫畫差唔多已經成為日本代表，而X Japan亦都成為日本國寶級樂隊，因為依2樣野中意左日本亦都好正常呀！

plan好大綱後，就開始諗語文。係人都知日本人英文係有限公司，而我日本亦都係有限公司，點先可以取一個平衡呢？思前想後之後，決定用淺白既英文，而我亦都貼左十幾張相(如網王，之前日本旅行相)上去等份野有趣d，我就係d相下面用我既有限日文寫左d感想。大約5個鐘之後我就完成左我4頁紙既計劃書，之後果幾日就搞下銀行存款證明之類既野，靜靜等待5月6號來臨。

7、8、9月出世既朋友被安排係5月6、7號去中環日本領事館交申請，而我就硬係覺得早d去會有著數，於是諗住6號領事館一開門就去到(即9點) 。果朝7點就起左身，仲早過平時返學，但係用左比我想象中多時間裝扮，8點多d先從沙田屋企出發。搭車果陣聽住網王同x japan既歌，心裡面諗住你地都要支持我成功呀，就好似我都好支持你地一樣……. 然後就到達中環地鐵站。我一路驚歎住原來返工時間既地鐵真係咁逼，一路朝住日本領事館所在地---交易廣場方向行。入到交易廣場，係眾多衣著光鮮，西裝LV上陣既上班一族之中，tee加牛仔裙加波鞋加背囊既我顯得又搶眼又寒酸，而我都終於到左46樓既日本領事館。

去到係差唔多9點，一出lift就有個保安叔叔問我lor身份證，佢睇錯我係6月出世，嚇到我以為要返屋企，搞清楚之後就叫我入去等領事館開始，而我係5號籌。入面已經有4個人等緊，我之後都有2個人入左黎，一到9點就叫我地去對面間房度交form。排隊果陣偷睇到前面個男仔份計劃書，又見到佢有日文獎狀，諗下自己4級都無去考都有d擔心，但係已經到我啦！ 成個過程都好快，個職員小姐剩係叫我改返form上面少少地方就比左張receipt我，之後就係漫長既等通知，6月15號網上面就會有結果，我既號碼係6883741。

走果陣聽到聽到保安一號同保安二號講：「今日都幾多人wor」二號就話「唔算多啦，而家得七個之嘛」，佢地之間普通既對話令我更加緊張，唔知今次多唔多人爭呢? 我會係幾多百個之中既其中一個呢？但係我可以做既已經盡全力做到最好，剩返既就要由領事館職員同埋神去決定啦。